De Pannekletser is de hoëgste ôngersjei-ing die door vastelaovesgezelsjap De Beerpiëp wuurt oétgereik. Op veurdrach van ’n ônaafhankelikke kemissie wao-van de samesjtelling allein bekind is beej de besjteursleeje van de Beerpiëp, wuurt de Pannekletser sinds 1981 idder jaor toegekind aan minse die zich individueel, as groep of vereiniging op bizôngere wiéze verdeenstelik hebbe gemak vur de Tegelse gemeinsjap. De naam van de ôngersjei-ing is ’n verwiézing nao ’t riéke keramische erfgoed van Tegele. De laurea(a)te krieg(e) tradisjoneel ouch ’n keramisch wangkbord, ontworpe en gemak door ‘nne bekinde kunstenaer.
De oétreiking vingk veer waeke vur vastelaovend plaats, veuraafgaond aan ’t oétkômme van ’t nieje Prinselik Trio, tiédes ’t Cambrinusbal in cultureel centrum De Haandert. In ôngersjtaond euverzich kent geej laeze wae de aafgeloupe jaore de Pannekletser in ôntvangs haet meuge nimme.