Tegele – De Pannekletser, de hoeëgste óngersjei-ing van vastelaovesgezelsjap De Beerpiëp oet Tegele, is dit jaor toegekind aan de Sjtichting Kingervekansiewerk Steyl. De oétreiking zal op zaoterdig 9 jannewarie plaatsvinge in kultureel centrum De Haandert in Tegele.
Al ruum ein halve ieëuw bezörg KVW Steyl kinger oét ’t kloësterdörp, maar ouch Tegele en angere umliggende plaatse, idder jaor ’n ónvergaetelikke vekansiewaek in de zomermaonde. Komplete generasies zien d’r mei opgegreujd. Vanaaf ’t begin waas daobeej de doelsjtelling det idder kingk de kans mót kriége öm daobeej te zien, ónge-ach de (finansjele) thoéssituasie. Tiëntalle vreejwilligers zette zich heej jaorliks veur in.
Binne KVW Steyl heers ein femiliegeveul det zoe sjterk is, det vuúl kinger die hebbe meigedaon, later as lei(st)er truuk kómme.
In 2018 woort de sjtichting daoveur al door de Steyler Duuvels óngersjeie met de Gôlde Kaetel. In naovolging van zöstervereiniging De Kaetelaers luët noow ouch De Beerpiëp zien waardering vur ’t gójje werk van dees sjoën vreejwilligersklöp zeen met de toekenning van ’t hoeëgste iérbetoën det de vereiniging kent.
Ut besjteur van KVW Steyl nimt op 9 janjewarie names alle vrijwilligers de 45ste Pannekletser in ontvangst.
Foto: Bart Douben