Sinds 2002 haet ouch de Beerpiëp, in naovolging van vuul angere vastelaovesvereiniginge, zien eige sosjeteit van wiéze manne. Op 17 november van det jaor woorte zeve leeje met ‘nne respektabele sjtaot van deens tiédes de interne äöpening van het vastelaovesseizoen door toenmaolig veurzitter Twan Driessen offisjeel beneump toet Ambassadeurs van de Beerpiëp.
Tiédes ’t seizoen van 2001 waas door inkele aad-raodsleeje al ens ’t veursjtel geôpperd ’n eige klöp op te richte binne de Beerpiëpfemiélie. In de loup van det jaor hebbe de inisjiatiefnimmers zich gebaoge euver de vraog wie dit gesjtalte zôl môtte kriége en wat zeej vur de Beerpiëp wôlle beteikene. Nao euverleg met ’t besjteur en ’t ôpsjtelle van ’n reglement en doelsjtelling vur dees klöp kôs d’r gezôch waere nao ‘nne passende naam. Naodet d’r versjillende veursjtelle
ware gelanseerd, besjtudeerd en aafgeweze is oéteindelik gekaoze veur “de Beerpiëp Ambassadeurs”.
Um lid te waere van dees klöp môs-se ônger angere eine erkinde sjtaot van deens binne de Beerpiëp hebbe opgebouwd en euver ’n bepaolde portie laeveservaring besjikke. En det letste kump zoewie bekind met de jaore. Angers gezag: jônge blaage die nag naat achter de oëre zien en net kômme kiéke, môtte zich iërs bewiéze.
De volgende persoëne kôste daorum in ‘t oprichtingsjaor geïnsjtalleerd waere:
Jan Kuntzelaers (aad vors/veurzitter), Jan Jacobs (aad vors/veurzitter), Hay Geurts (aad veurzitter), Sjraar Cleophas (aad besjteurslid), Piet Jeucken (aad besjteurslid), Kees Kivits (áad adjudant/raodslid) en Graad Stroeks (aad-lid technische kemissie).
Later hebbe Thei Jagt (aad-besjteurslid), Twan Driessen (aad- veurzitter), Theo Schmitz (aad-besjteurslid), Wil Soepboer (aad-vors), Geert Geurts (aad-sirremoniemeister), Paul Stevens (aad-besjteurslid) Cees Kooijman, Marcel Wijnhoven (aad prins/besjteurslid), Jacques Hilberts (aad-besjteurslid), Peter Verbeek (aad chef du protocol) Marcel van Lier (aad-vors), Fred Keijsers (aan-veurzitter) en André van Aarssen zich daobeej aangesjlaote. Jaomer genóg zien Hay, Sjraar, Thei, Piet, Geert, Twan en Jan ós intösse óntvalle. Kees Kivits, Marcel Wijnhoven en Jacques Hilberts zien gen lid mier.
De doelsjtelling van de Beerpiëp Ambassadeurs is zich achter de sjêrme in te zette veur de vereiniging en ’n adviserende taak richting besjteur te vervölle. Ouch zulle zeej beej alle evenemente van de Beerpiëp aanwezig zien. Met eure sjtaot van deens en enorme sjat aan ervaring binne de Tegelse en Limburgse vastelaovend zien de Ambassadeurs ’n gerespecteerd insjtituut binne de Beerpiëpfemilie!
