Nao twieë jaor veurbereiding haet ‘Project Charles’ eindelik zien vruchte aafgeworpe. Op 22 januari is Jarno Hanraets oetgerope toet Beerpiepjeugprins 2023. Zien adjudante Bram (Achten) en Lars (Tuithof) make ’t Trio compleet.
Prins Jarno I is 17 jaor en woeënechtig op de Remungsewaeg op Sjteyl, same mèt zien elders Rob en Linda en zuskes Ilse, Liza en Eline. In ‘t dagelikse laeve reis Jarno aaf nao ’t Uuleriek in Remung öm heej de opleiding installatiemonteur woeëningbouw aan ‘t Gilde te volgen. ‘T vastelaovendviere is öm al vruueg aangelierd en waar zelfs genetisch bepaold. Euvergroeëtoma ‘Lieske’ zjweijde de scepter in kefee Maeghs, wao oeëts Petatte Nelke nag ‘t laevesleech zoog. Conditioneel is hae ouch klaor vur zien prinssjap. Normaal gespraoke zjweijt Jarno namelijk neet mèt eine scepter, maar mèt ’nne kajakpadel. Dit duit hae zelfs op zó’n hoeëg niveau det hae in Slovenëe al ens Nederland moch vertaegenwaordige op ‘t EK juniore.
Adjudant Bram is 16 jaor en woeënt ouch op Sjteyl. Bram is genne onbekende in de Sjteylerse vastelaovend. In 2019 waar hae nag Jeug Vors Lucifer beej de Kaetelaers. Mèt zien opgedaone ervaring ken hae prins Jarno nag van de nudige tips veurzeen. Bram woeënt samen mèt zien vader Roy, moder Melanie en zuske Bo op Aan de Pas. Vader Roy ken de hieëre veurzeen van eine prinsmobiel met ziene riesjoeëlwage. Bram helt zien conditie op piel beej TC De Snelle Sprong. Verder haet ‘t enthousiasme vur twieëwielers ‘m te pakke en is hae dök te zeen op zienem brommer. Dae ken hae gebroeke öm aaf te reize nao de Ruiver, wao hae sjtudent is aan ‘t Grescollege.
Adjudant Lars is mèt zien 18 jaor d’n aadste van de dreej. Ouch hae woeënt op Sjteyl en wal oppe Parksjtraot same mèt pap Dirk, mam Tamara en zien twieë breurkes Kurt en Bjorn. As telg van ein bekende Sjteylerse femielie is hae al jonk besjmet geraak mèt ’t vastelaovesvirus. Ziene pap waas in 2013 Vors Lucifer beej de Kaetelaers. Net as de prins sjtudeert Lars in Remung op het Gilde. Hae volg dao de opleiding toet technicus mobiele werktuigen. Lars waar same mèt Jarno ouch in Slovenië op ‘t EK kajakke. Hae haop heej zelfs ‘n vervolg aan te gaeve en is bezig mèt ‘t kwalificere vur ‘t WK U21.
De verbingende factor van dees dreej jonges is ‘t lidmaatsjap van de jeug van Vv. De Kaetelaers. Zeej hebbe alle dreej ein zjwart en roeëd hert en zien echte Sjteylerse jonges. Toch hebbe weej ouch al get wit/greune tinte kenne vinge en zulle zeej ’t fieësje van de Beerpiëpjeug veurop gaon. Zeej hebbe twieë kier zoeë lang d’n tied gehad as normaal öm zich veur te bereide, dus zulle ouch dubbel zoeë hel d’r taegen aan gaon. Dit alles ónger eur motto:
As Sjteyler Duuvels sjreuje weej idderein de vot, det doon we dit jaor ouch beej de Beerpiëp as det mót!
