De Pannekletser, de hoeëgste óngersjei-ing van vastelaovesgezelsjap De Beerpiëp oet Tegele, is dit jaor toegekind aan Bart Faassen. De oétreiking zal op zaoterdig 17 jannewarie plaatsvinge in kultureel centrum De Haandert in Tegele.
Met de keus vur Bart Faassen krieg de 44ste oetreiking van de Pannekletser de extra allure die pas beej dees jubileum-edisie. Want de 71-jäörige Tegelenaer haet met ziene inzet vur de gemeinsjap ‘nne enorme sjtaot van deens opgebouwd. Hae is ónger mier al tiëntalle jaore aktief beej vastelaovesgezelsjap D’n Oeles, hockeyklöp THC (noow Delta Venlo), joekskepèl Sókkerpáek, de Tegelse Óngernimmers Klöp (TOK), veurzitter van de Sjtichting botanische tuin De Jochumhof en besjteurslid van de Sjtichting 150 jaor Kloësterdörp Steyl.
En det is nag maar ‘nne kleine greep oét zien pagina’s lange c.v., det vur ’n groët deil oet besjteurlikke funksies besjteit. Zoe zit hae ouch in ’t besjteur van de Samewirkende Limburgse Vastelaovesvereiniginge (SLV), ein van de twië provinsjale carnavalsbónde.
Bart waas in 2000 prins van D’n Oeles. Eine angere groëte mijlpaol in zien maatsjappelikke laeve waas ’t hónderdjäörig besjtaon van Faassen Plants in 2024, ’t femiliebedriéf det hae decennia lang leidde en det beej gelaegenheid van ’t jubileum dit jaor ’t keuninklikke predicaat ‘Hofleverancier’ kreeg.
