Wae de jeug haet, haet de toekóms. En die toekóms is vur de Beerpiëp noow aangebraoke! Met prins Jordy Verhalle en zien adjudante Jelco Schreurs en Stan Trossel is ein nieje generasie greun en wit opgesjtaon.
Vastelaovesgezelsjap De Beerpiëp besjik allewiels alwir ruúm 15 jaor euver ’n eige jeugaafdeiling, opgerich op de magische datum 11-11-11. De insjtaek waas öm as vereiniging ouch get te beteikene vur de ajere tieners van Tegele, de opgesjaote jeug zoegezag, in de laeftiéd van 15, 16 jaor wies örges begin 20. Eine vergaete groep in de vastelaovend, det bleek al sjnel. De Beerpiëpjeug greujde oét toet ein volwasse klöp binne de vereiniging, die dao noow dankbaar de vruchte van plök. Vanoét de jeugraod zien al versjillende jóngere doorgesjtruimp nao de groëte raod van elf. Hoëg tiéd dus öm ouch ’n prinselik trio oét dae kweekviéver te visse, mót de prinsekemmissie hebbe gedach!
Det dae primeur aan um is gegund, ken Jordy Verhalle nag amper bevatte. Eine prins oét eige geledere, det doon ze toch allein beej hoëge oétzóngering? In ’n jubileumjaor beejveurbeeld? Pas wie de scepter beej um thoés vur zien naas op de keuketaofel woort gelag, begós ’t langzaam door te dringe. Prómp vloog ’t jaowaord d’r oét. In houfletters! 
Ouch euver de name van zien adjudante heufde hae gen sekonde te prakkezere. Jelco en Stan, twië kammeräöj wao-mei hae in de Beerpiëpjeug vanaaf ’t begin is opgetrokke.
Prins Jordy I is 32 jaor, woënt same met ziene partner Tim Raats oppe Keuningsjtraot en werk as vrachwagechauffeur beej Steenbergen Transport in Venlo. Adjudant Jelco Schreurs (31), gebaore op vastelaovesmaondig, is met Esmee Nijssen en eur döchterke Liv woënachtig op de Beekpunge in ‘t Maasveld en van beroep magaziénmeiwerker beej PVH in Venlo. En adjudant Stan Trossel (34) haet ’n huúske oppe Remungsewaeg en werk beej de firma Topcoat in Tegele.
Wat eur verbingk, is euverdudelik. De vrindsjap die zeej deile, is beej de Beerpiëp óntsjtaon en met ’t jaor hechter gewaore. Net wie eure bangk met ‘greun en wit’. Prins Jordy waas d’r op dae gedinkwaerdige elfde van d’n elfde in 2011 al beej wie de Beerpiëpjeug zich gruuëts prizzenteerde, en behuërt same met Jelco toet de allerierste lichting. 
Stan is ein broor van aad-jeugvors Frank, dae deil oétmakde van ’t ierste Beerpiëpjeugtrio. Wie ’n paar jaor geleje ’t moment kwaam öm aafsjiéd te nimme van de jeugraod, hebbe zeej alledreej met volle euvertuúging de euversjtap nao de ‘groëte Beerpiëp’ gemak. Det waas in ’t begin wal efkes wenne, maar ouch dao hebbe zeej eur plekske weite te vinge en veule ze zich allewiels hielemaol thoés. Det ziene pap destiéds nag in de raod van elf zoot, makde ’t vur Jelco wal hiel sjpesjaal.
Eure liéfsjpreuk sjprik gans vur zich:
