Maak uch de borst maar naat, want dit jaor wuuërt eine knaller met ut jeugdtrio van de Beerpiëp! Prins Sam I (Berden), saame met zien adjudante Pepijn (Billekens) en Sam (Custers), sjtaon te sjpringe um Tegele op zien kop te zette!

Prins Sam I is woënachtig op de Erkenkamp in Tegele, saame met zien elders Stan-Mark en Joyce en zien breurke Sjuul. As aadste van de kinger in huize Berden is hae 16 jaor aad. Hae zit op ut Valuas in Venlo waor hae nog druk studeert in 4 HAVO. Beej sjportclub TSC Irene in Tegele is hae te vinge op ut middenveld van JO17-3. Dit duit hae saame met zien beide adjudante in utzelfde team. Met prins Sam haet de Beerpiepjeug dit jaor eine muzikale hoëgheid gevonge. Van vastelaovesmuziek op standje gehuuërbesjadiging, wies as echte Don Juan gitaar sjpeule, prins Sam is van alle muziekmèrte thoés. Prins waere van de Beerpiëp-jeug is dit jaor extra tof, zeker nao ut veurbeeld van ziene pap aafgelaupe jaor beej de Oeles. Maar 2026 is út jaor van Prins Sam I!

Adjudant Pepijn is van ut zellufde bouwjaor as de hoëgheid en is dus auch 16 jaor aad. Pepijn woënt op de Ringelwikke in Tegele met zien elders en zus Lotte. Hae is van de Sint Jozefsjoël in Tegele verder gaon liére op ut Blariacum en is noow bezig aan de studie H.T.V. in Remung, as veurbereiding op de opleiding tot pliesie-agent. Voetbal is hobby nr 1 in zien laeve, saame met prins Sam en adjudant Sam beej TSC Irene in de JO17-3. Maar auch beej VVV mis hae as echte fan genne eine wedstriéd.

Adjudant Sam, de Venlonaer oét dit trio. Jongste in de riej van 3 kinger en woënachtig op de Langsjtraot in Venlo. Sam haet in Tegele op de basissjoel gezaete en volg noow 5 HAVO op ut Valuascollege in Venlo. Sam is beej TSC Irene de verdeidiger van JO17-3, waor hae as echte Virgil van Dijk zien menke sjteit op ut veld. Hard werke is veur Sam inmiddels al ein ech laevesmotto, as hae neet voetbalt of op sjoel is kint ge Sam vinge beej Galerie de Hoeve of Domani in de bedeening of keuke.

Dees dreej jonges gaon dit jaor de jeug-vastelaovend op sjleiptouw nimme, en det doon ze onger eur motto:
Normaal doon weej lekker balle, maar met de vastelaovend gaon weej pas éch knalle!