Met de Leedjesaovend alwir achter ôs, kump de sjtart van ’t nieje vastelaovessezoen rap doënderbeej. Naeve de bekinde festiviteite die daobeej huure tiédes d’n Elfde van d’n Elfde, wuurt auk weer D’n Opsjtaeker™ veur ’t iérs te kaup aangebaoje. Dit jaor is det ein extra bizóngere gelaegenheid, want ’t is eine echte jubileumedisie: 2 x 11 jaor!
De iér öm de 22ste Opsjtaeker te make is aan Maarten Grob oét Steyl te beurt gevalle.
In Pannerden zulle de minse toch ein partie gruuëts zien! In det iélig dörpke in Gelderland woort 54 jaor geleeje namelijk d’n óntwerper van dees zier spesjiale oétveuring van D’n Opsjtaeker gebaore. Umdet de vader van Maarten viéf jaor later werk kreeg in Bliërick, kwame zeej al vlôt met ’t gezin op de Hei in Tegele terech. Allewiels woënt Maarten op Steyl met zien partner Thekla en euren twiëling van 13 jaor.
Al vruug waas Maarten eine kreativeling en dus waas ’t gen verrassing det hae nao de middelbare sjoël op de Kunsacademie terech kwaam. Dao volgde hae de opleiding ‘Visuele Communicatie’. As grafisch vormgaever haet hae daonao beej diverse reklamebureau’s gewerk, veurdet hae veurig jaor besjloot um veur zichzelf te beginne.
Naeve grafisch vormgaever is Maarten illustrator, maar hae probeert auch op angere wiéze zien kreativiteit in te zette. Zoe guuef hae gaer kreative ‘workshops’ aan kinger en waas hae aafgelaupe jaor ein van de ‘Wijkmakers’ in de Bliërickse wiék Vastenaovendkamp. Same met de bewoëners werkte hae aan ’t door um bedachte Vlaggeprojek, bedoeld öm de saamhuúrigheid in de wiék te verbaetere. In Venlo is Maarten auch bekind as d’n teikenaer van ‘Koekwaus’, wao hae ein aantal bukskes van haet gemak en wao noow auk ein leuk niej projek van löp: de Koekwaus Kruumeltoch. Taeves is hae óngerdeil van teikenaerscollectief Usake Wok, det onder angere bekind is van ‘Greekbaer’.
Auch al is Maarten ‘neet van heej’, hae haet de vastelaovend van jóngs aaf aan gevierd. Det deej hae iërs as jungske same met zien elders in Tegele, en later auch tiédes zien sjtudie in Mesjtreech. Nao zien sjtudie is d’r auch ein periode gewaes waobeej vastelaovend beej um op ein liéger pitje sjting, maar taegeswaordig viert hae ’t weer, same met zien gezin of met zien vrinde.
In zien ôntwerp van D’n Opsjtaeker is det ‘same viere’ den auch truuk te zeen. De letters van Vastelaovend zien allemaol as gezichte weergegaeve. Det is de verwiézing nao ’t sáme met mekaar viere, maar wal op dien eige wiés.
D’n Opsjtaeker 2026 is vanaaf d’n Elfde van d’n Elfde verkriégbaar via de samewerkende vastelaovesvereiniginge. De opbrings kump gehiël ten bate van de vastelaovend binne de ganse gemeinte Venlo.
