Kómmend weekeinde vèlt in gans Tegele, Sjteyl en oppe Hei alwir de 39ste edisie van ’t Piepke gratis en vur niks op de deurmat of in de breevebös.

In dees nieje oétgaaf van ós vastelaoveskrant wuuert veural veuroétgeblik op wat ’t nieje vastelaovessezoen in petto haet. Vastelaovesgezelsjap De Beerpiëp haet wir ’n kompleet programma vur uch samegesjteld, zoe-as geej det van ós gewind ziet. 

Ouch al wille weej indachtig ’t nieje Tegelse motto ‘Laot ’t achter dich’ ’t leefs neet mier al te vuúl achteröm kiéke, vastelaovend 2022 had toch ouch zien sjarme. Det bleek wal oét de oproop van de redaksie öm versjlaag te doon van wie zeej ’t fiés óndanks de beperkinge hebbe belaef. Dao zien hiel get leuke reaksies op binne gekómme. De verhaole euver de fiësjes die thoés in kleine kringk zien gevierd, zien ‘nne lekkere opwermer vur wat d’r binnekort gelökkig wir kómme geit.

Losse exemplare zien nao 8 jannewari aaf te haole beej Albert Heijn en beej Plus Verbeten oppe Hei.

De redaksie van ’t Piepke wins uch alves vuúl laesplezeer!