Ut leech ging vurrige maond al op greun (!), allein waas ’t programma nag neet róngk. Noow det ouch klaor is, kenne weej ’t eindelik van de dake sjriëuwe: d’r kump wir ein Spätsjoppe in 2025!
Spätsjoppe op vastelaoveszóndig beej Coëba oppe Keuningsjtraot is ein tradisie die neet verlaore meug gaon! Idder jaor sjtruimp ’t kefee en ‘t zaelke vol met minse die vastelaovend aajerwets gezellig wille aaftrappe op de ierste van de dreej dolle daag.
En det geit dus ouch in 2025 gebeure! Nao ’n jaorelange samewerking met de Alfa-fanklöp, wao weej met vuul plezeer en ein good geveul op truuk kiéke, geit vastelaovesgezelsjap De Beerpiëp de ker allein trekke. Want dao zien we 5×11+3 jaor geleeje veur opgerich: um vastelaovesaktiviteite te organisere in hertje Tegele en dit prachtige volksfiës daomei in sjtand te haje!
Zóndig 2 maart ziet geej allemaol dus wir van herte welkom beej Coëba. We hebbe artieste, eine dj en get lekkers te aete en drinke. En de sjtumming: dao zörge we same veur!
Vertel ’t door aan idderein dae ’t wil huúre en zet ‘nne groët greun (!) rundje um dae datum op ugge kalender. Spätsjoppe 2025 kump d’r aan! Definitief!!
Mier informasie laes geej volgende maond in ’t Piepke, ós vastelaoveskrant die ouch dit seizoen gratis hoés-aan-hoés zal waere bezörg. Haaj ouch de sosjal media in de gate!