Vrouwe aan de mach! In de politiek en ’t bedriefslaeve is ’t de gewuënste zaak van de waereld en ouch in vastelaoveskringe luët de emansipatie zich neet mier aafsjtoppe. Maar wae dörf? De Beerpiëp dus! Nao 5 kier 11 jaor meug vur ’t iers ein vrouw met de scepter zjwei-je!
Sandra Geraats-Simons geit de gesjiedenis in as de allerierste offisjele prinses van Tegele! Sjterker nag, ouch naeve um sjtaon twië vrouwe. Same met zien adjudantes Esther Verkoelen-Hermans en Wendy Janssen-Hoeben vormp prinses Sandra I ’t prinsesselik Beerpiëp Trio van 2023!
Dae geweldige sjtunt had de Beerpiëp eigelik al in petto vur 2021, maar we weite allemaol waoröm det neet doorging. In de herfs van det jaor begós ’t blood aevel opniej te kriebele. Efkes waas d’r haop det ’t in 2022 ging gebeure, maar wir sjloog ’t coronasjpoëk d’n druim aan diggele. Vur d’n twiëde kier woorte de sjerve beejein gevaeg. Want dees dreej vastelaovesgekke vrouwluuj ware neet van plan öm de (Beer)piëp aan Maarten of wae den ouch te gaeve! Dreejmaol is sjeepsrech!
Op 21 jannewarie kwaam eure maedjesdruim oét. Nao ein ‘zjwangersjap’ die haos veer (!) kier zoe lang deurde as normaal, woort op de buun van de Haandert ein historisch dreejsjpan gebaore. Maar boéte det ouch ein trio det van wante wet. Wat det betref is de houfrol neet vur niks weggelag vur Sandra. Wae kent um neet in Tegele en umsjtreke. As zangeres haet ós prinses neet allein as de sjarmante helf van ’t duo Sandra & Marco maar ouch solo én met ónger mier de band Sound Express zien sjpore al mier as verdeend.
Prinses Sandra I, getrouwd met Rob en mooder van Milan (18) en Vinn (16), moch as kingk al ens ein houfrol vervölle in ’t groëte vastelaovessjpel. In 1988 vormde Sandra same met Pascal Schmitz ‘t jeugboérebroédspaar van zöstervereiniging De Boereraod. Daonao zien echgenoët Rob, adjudant van Beerpiëpprins Fred I in 2002, zoon Milan (jeugboérebroédegom beej de Boereraod in 2016) en zien breurke Vinn (Oelesjeugprins in 2019) zien veurbaeld gevolg.
Sandra woént met zien vastelaovesgekke gezin aan de Riethsjtraot en is bezig met de opleiding toet houfkondukteur beej de NS.
Adjudante Esther Verkoelen-Hermans (47) haet same met ziene man Patrick ein dochter, Joy (18), en werk beej Berden in Bliërick as leidinggaevende op de kingeraafdeiling. Adjudante Wendy Janssen-Hoeben (50), getrouwd met René en mooder van Noah (21) en Kaela (18), mak ’t vrouwelik dreejsjpan kompleet. In taegesjtelling toet Sandra is Wendy juus in de vootsjpore van zien kinger gesjtap: Noah woort in 2020 oétgerope toet jeugprins van De Beerpiëp en Kaela waas in 2016 ’t boérebruúdje van Milan – Sandra ziene aadste zoon- beej de Boereraod, wao Wendy al jaore lid van is en ziene pap besjermhiér. Ziene werkgaever is Forta4U, ein organisasie vur jóngere met eine aafsjtand toet de arbeidsmèrt.
Dees dreej hertsvriendinne zien met hert en zeel aan elkaar verknoch en vinge ’t ein bizónger veurrech öm as alleriérste prinsesselik trio mei veur te meuge gaon in de Tegelse vastelaovend ónger ’t motto:
‘De naegelkes gelak en de häörkes gekap, de lipkes getoét en de borsjes veuroét, tovere weej deze vastelaovend eine lach op uch sjnoét!’
