Prins Jari I geit same mèt Milan en Mano veurop beej de Beerpiëpjeug

Prins Jari is 17 jaor aad en gebaore op 6 Februari 2007 in ‘t ziekenhoes van Venlo. Sjtudere duit Jari nag flink, hae is dit jaor eindexamelieërling vwo op College Den Hulster in Venlo. Naeve leuke dinger doon mèt zien kammeräöj geit hae gaer nao ‘ne voetbalwèdsjtried van Ajax. De vastelaovend sjpeciaal make geit ‘m waal lökke, Jari wèrk namelik beej de Sjtevel ,wao de frikkedelle joeksig aangekleid waere. Daonaeve haet hae ouch nag ‘n beejbaan beej Albert Heijn, sjtilzitte is niks vur ózze prins! Zien nie rol as Beerpiëp-jeugprins zit Jari in ‘t blood, persies 50 jaor naodet zienen opa Thei Ewals Beerpiëpprins waas, meug Jari ‘m opvolge als jeugprins van de Beerpiëp!

 

Adjudant Milan is ‘n jäörke ajer als d’n hoeëgheid en is op 9 oktober 2006 gebaore in Venlo. Hae volg de opleiding toet óngerwiesassistent beej Gilde Opleidingen in Venraoj, wao hae ouch dit jaor haop aaf te sjtudere. Heejmei hebbe we einen ervare jóng in ‘t trio zitte öm de Tegelse jeug mei op sjleiptouw te nimme. Milan is net wie prins Jari gek van voetbal en sjpult in de 019-2 van Venlosche Boys, dus mèt zien conditie zit ‘t- as ‘t good is- waal good. Net as prins Jari hèlt Milan van chille mèt kammeräöj, wat eur als trio verbingk. Get euro’s beejverdene duit hae beej Domino’s pizza.

 

Adjudant Mano mak dit trio compleet. Hae is mèt zien 17 jaor net zoeë aad als d’n hoeëgheid, en gebaore op 21 maart 2007. Hae sjtudeert vur loeëdgeter aan ‘t ROC Ter AA in Helmond, waomei hae haop euver ein paar jaor as echte vakman aan de sjlaag te kènn gaon. Praktisch wèrke mak det Mano den ouch ech hielemaol in zien element is. Net as Jari en Milan duit hae gaer chille mèt kammeräöj (geej meug raoje wae det zien) en aaf en toe taege ‘n belke trappe. Hae wèrk beej Justin Installatie en det beejbaantje pas perfek beej zien opleiding.

 

Zeej viere vastelaovend ónger ‘t motto:

Weej sjpringe, fieëste en gaon wies laat door…
Vastelaovend viert idderein in Tegele dit jaor!

Deil dit niejsberich: