Ouch beej de Beerpiëp haet de jeug de toekoms. Roger de Boer is nao Niels van Rijt ‘t twiëde besjteurslid det aafkomstig is oét de jeugaafdeiling van ‘t vastelaovesgezelsjap.

Roger de Boer (26), veurhaer sirremoniemeister beej de Beerpiëpjeug, woort woensdig 23 oktoëber tiedes de jaorlikse algemeine leejevergadering unaniem gekaoze as niej besjteurslid. Hae mak kómmend sezoen de euversjtap vanoét de jeug nao de groëte Raod van 11.
Daonaeve woort sikkertaris Patrick Schreurs, ouch met algemeine sjtumme, herkaoze vur ‘nne nieje termién van dreej jaor. Hae mak vanaaf 2012 deil oét van ‘t besjteur.

Vastelaovesgezelsjap de Beerpiëp äöpent ‘t nieje sezoen op d’n elfde van de elfde tradisjoneel met bekind te make wae in 2020 wuúrt óngersjeie met de Tegelse Pannekletser. Det gebeurt veur aanvang van ‘t insjete van de vastelaovend door de Samewerkende Tegelse Vastelaovesgezelsjappe (STV), woë de Beerpiëp deil van oétmak. Nao ‘t insjete op ‘t Oelesplein (vanaaf 19.11 oor) waere de festviteite vervolg beej Kefee Sintermerte, met meziék van de band Waan. Idderein is welkom öm de sjtart van vastelaovend 2019-2020 mei te viere.

Op 16 november volg de interne sezoensäöpening, woëbeej de jubilarisse waere gehöldig en ouch inkele protocollaire wisselinge plaatsvinge.