Net zoewie alle angere vastelaovesvereiniginge mak Vg De Beerpiëp zich langzaam maar zeker op vur ’t nieje sezoen. Op de ierste beejeinkóms sunk angerhalf jaor, woort vurrige maond aevel iers eine doorkiék gemak nao de jaorgang 2022-2023.
Den viert De Beerpiëp namelik ‘t 5×11-jäörig besjtaon!
Ein jubileum det eigelik vur kómmend sezoen al op de rol sjting. Maar umdet zöstervereiniging De Boereraod den 6×11 jaor besjteit, is in good óngerling euverleg besjlaote öm ’n jäörke op te sjuúve.
Ónger ’t motto ‘ut heuf maar klaor te zien’ is op zaoterdig 25 september tiédes ‘nne gezellige en zóneuvergaote barbecue alves ’t jubileumlogo geprizzenteerd door Erik de Bitter, Beerpiëpprins 2020 en veurzitter van de jubileumkemmissie. Woë-in hae ouch wir geflankeerd wuuert door, ónger mier, zien adjudante John en René.
Zoewie de meiste grafische kreasies woë-mei De Beerpiëp zich gaer wil óngersjeie, is ouch dit logo ’n co-produksie van Rob Geraats en Fred Keijsers. Zeej hadde zich d’r mekkelik vanaaf kenne make door ’t vereinigingslogo van get toeters en belle te veurzeen, maar det waas vur eur allebei gen opsie. In plaats van ‘nne lauwerkrans of ’n golde rendje, hebbe zeej gekaoze vur sjlingers en confetti öm ’t fiëstelikke aspek extra te benaodrökke. Elegant in mekaar gekröld, ónthölle dees sjlingers de contoure van de piëp, die al vanaaf 1967 ’t herkinbare beeldmerk van ós gezelsjap is. Det letste geldt aeve ziér vur de prinsesjteek, dae daorum ouch neet meug óntbraeke. De cijfers ‘5’ en ‘11’ zien umgedreijd, waomei Fred en Rob ‘krangs-öm’ inhäöke op ’t motto van vastelaovend 2022: ’t dreijt wir! Maar den angersöm dus.
Daomei is de ierste sjtap nao ’t jubileumjaor al gezatte, veurdet ’t nieje sezoen überhaup is begós. Besjteur, Raod van 11, kemmissies, leeje en maedjes haope van herte det vanaaf d’n elfde van d’n elfde nag maar ein virus is det d’n deens oétmak: ‘t vastelaovesvirus.
