Alle boereproteste van aafgeloupe jaor ten sjpiet krope dees jónges neet op euren trekker öm naor ’t Malieveld in Den Haag te gaon of heej en daor de waeg te blokkere. Zeej heelde ’t nao dé vraog van Beerpiëpjeugvors Vince doeënder beej hoes en sjpronge op de vastelaoves-expres door Tegele.
Op d’m boek van dae vastelaoves-expres zit dit jaor de 18-jäörige Prins Noah I. Hae is de zoon van René Janssen en Wendy Janssen-Hoeben en broor van Kaela, same woeëne ze in ’t Maasveld. Noah volg de opleiding coördinator beveiliging op het ROC Nijmegen in Boxmeer. As hae neet mèt zien sjtudie of ein van zien vuuele hobby’s bezig is, verdeent hae zich eine cent naevembeej in Bekkerie Ewals (De Böl). Det vastelaovend beej Noah daor de aore sjtruimp haet hae laote blieke beej de jeug van d’m Boereraod. Maar ouch blauw blood sjtruimp, hebbe we ierder gezeen, waor ’t neet gaon ken. Naodet ziene opa Sjraar Hoeben, besjermhieër van d’m Boereraod, in 2011 de hoeëgste óngersjeiing van vg De Beerpiëp, De Pannekletser, haet meuge ontvange, velt nów ziene kleinzoon de hoeëgste ieër beej de jeug ten deil, ’t meuge veurgaon as jeugprins.
Adjudant ein is Levi Schrijver, net wie de prins 18 jaor. As zoon van Louis Schrijver en Patricia Schrijver-Hoeben woeënt hae same mèt zus Tessa baove oppe Hei. Levi volg net wie d’n hoeëgheid ein opleiding coördinator beveiliging aan ’t ROC Nijmegen en det kump good oet in zien baantje beej Special Security Group (SSG). As hobby duit hae gaer sjporte en ‘n (poker)kaertje legge mèt zien kammeräöj. Ouch hae lierde ’t klappe van de vastelaoveszjweep beej jeug van d’m Boereraod
Adjudant twieë, de 16-jäorige Dyaro Jansen mak ’t jeugtrio van 2020 compleet. Mèt zien elders, Richard Jansen, Debbie Jansen-Hoeben en zuske Djarah woeënt hae op Sjteyl. Dyaro zit op ’t Blariacum College waor hae ein opleiding kader D-P volg. Dyaro trap gaer taege ’n belke beej Spc. Irene, de contributie verdeent e zich beejein beej Albert Heijn in Tegele. Verder duit hae ónger angere nag gaer visse en ’n kaertje legge.
In Tegele, Sjteijl of oppe Hei, det is ós öm ’t aeve,
Zoeë lang weej maar mèt uch dae vastelaovend kenne belaeve!
