Insjeete en bekindmaking laureaat Pannekletser 2024

D’n elfde van d’n elfde is d’n datum det ós vastelaovesblood wir get hèlder begint te kriebele. Vur de Beerpiëp is ’t ouch ‘nne sjpannende daag, aangezeen dae aovend tradisjoneel bekind zal waere gemak wae in ’t nieje sezoen de Pannekletser kriég.

Aan Oelesvors Roy Peters is de iér öm de naam van de nieje laureaat aopenbaar te maken tiédes ’t insjeete van Vastelaovend 2023-2024. Intern waere de leeje van de Beerpiëp kort daoveur al oppe huuegte gebrach wae op 13 januari 2024 de hoëgste óngersjei-ing van ós vastelaovesgezelsjap in óntvangs meug nimme.

Zaoterdaág 11 november zal op ‘t Oelesplein in hertje Tegele de Vastelaovend waere ingesjaote door de veer Samewerkende Tegelse Vastelaovesgezelsjappe (STV).

’t Insjeete begint öm 19.11 uur. Op ‘t Oelesplein aan de kruutsing van de Bergsjtraot, Ingersjtraot en Poshoéssjtraot zulle de vereniginge D’n Oeles, De Kaetelaers, De Boereraod en De Beerpiëp zich verzamele. Via ellef kanônsjlaeg van ‘t Oelesgesjöt zal ‘t sjtartsein gegaeve waere vur ’t niej-je Vastelaoves-jaor ônger toezeend oug van ‘t regiment Frei-Husaren von Glasenapp 1760. Joekskapel Tegels Blood zal vur de muzikale noot zörge.

Nao afloup (rongk 20.00 oor) zulle de vereiniginge in optoch nao Kefee Sintermerte vertrekke, wao gezamelik geproos zal waere en d’n Tegelse Vastelaovend wuërt ingeluúd.

 

Deil dit niejsberich: