Pater Johannes Brugman laefde van 1400 wies 1473 en is dus op de kop aaf 550 jaor doëd. Toch haet dae erme mins noëts zien rös gevónge. Want d’r waas d’r eine dae um iëuwe later wis te euvertreffe. Ennen Tegelse nag wal. En wat veur eine!

Sjpraeke wie Brugman. In de Diéke van Dale sjtaon beej bekinde oétdrökkinge gen plaetjes as veurbaeld, maar wat ós betref zól ein foto van Jan Kuntzelaers in dit geval neet missjtaon. De definisie ‘Met vuúl euvertuúgingskrach praote’ is oétgesjpraoke Jan. Of hae noow get zinnigs te vertelle had of allein maar sjaele wazel sjting te verkoupe, jidderein hóng aan zien lippe.

Dit jaor is ’t presies ein halve iëuw geleje det Jan met ein sjmoesje nao kefee De Lange woort gelok en as körsvers Beerpiëplid wir nao boéte sjtapde. Veurdet hae d’r erg in had, waas-e gebómbardeerd toet vervanger van vors Henk Beurskens, dae vanwaege ein hertoperasie de prónkzitting neet kós prizzentere. Jan bleek ein netuurtalent. Gauw genóg kreeg hae de vaere definitief op zienen hood en greujde hae oét toet ’t gezich van ós gezelsjap. Maar neet allein op de vastelaovesbuun waas hae ’t boegbeeld van de Beerpiëp. Tegele lierde um ouch kenne as prizzentator van de roemruchte kiénaovende wao minse vanoét de wiejen umtrek op aaf kwame. Jan wis daoveur beej de Tegelse middesjtand de meis fantastische priéze los te peutere. En den lökde ’t um ouch nag öm diezelfde óngernimmers ein advertensie aaf te troggele vur de Beerpiëpkrant, later ’t Piepke, waovan hae de grónklegger waas.

Zoe haet Jan zich ouch ein laeve lang vasgebete in zien werk. Gen oétdaging waas um te groët of zjwaor. Hae waas eine mins van hèl peze, ‘knuure’ op zien Tegels. Of det noow doézend maeter ónger de grónk in ein kaolemién waas, beej de geeterie-j of in ’t transport, wao hae ’t langs in aktief is gewaes.

Viéftig jaor haet Jan volgemak as lid van de Beerpiëp. Daovan waas hae ruúm viéftiën jaor vors. Vur de groëtse wiéze wao-op hae die funksiej haet vervöld, is beej zien aafsjiéd de iëretitel ‘Groëtvors’ aan um verliënd. Maar nag gruëtser waas hae volges eige zegge op zien oétverkezing toet Pannekletser, de hoëgste óngersjei-ing van de Beerpiëp, in ’t jaor 2003.

Zien letste groëte waopefeit waas ’t mei-j oprichte van de Beerpiëp Ambassadeurs, ’t illustere gremium van aadgedeende die eur sjpaore binne ós gezelsjap langk en breijd hebbe verdeend. Zoë bleef Jan nag wies op hoëge laeftiéd betrokke beej zien greunwitte femilie.

Ózze nestor is neet mier, de sjpraekbúus zjwiég vur altiéd. Weej zien d’r sjtil van.