Met ein trio det neet allein hobby’s en ’n hechte vrindsjap deilt maar ouch dezelfde sjtamboum haet, geit vastelaovesgezelsjap De Beerpiëp ouch dit jaor op zeker. De prins en zien adjudante zien femilie van-ein en vorme allein al daorum ein uniek dreejspan.

Erik de Bitter is nummer 53 in de prinsegalerie van De Beerpiëp, en laot det now net ouch ziene laeftiéd zien! Hae nimp de scepter euver van Danny Leenders, dae zich nao zien aafsjied in november haet aangesjlaote beej de Raod van 11 en daomei in de vootsjpore van minnige veurgenger sjtap. De nieje Beerpiëpprins haet ervaring met veurop gaon. In ‘t dageliks laeve guëf hae leiding aan ’t bedriéfsburo van de firma Kempen Transport BV, ein van oërsjpróng Tegels transportbedriéf det op ’t veilingterrein in Grubbevors is oétgegreujd toet ‘nne belangriéke sjpeuler in logistiek Limburg. Prins Erik I woënt same met zien Dani en eur kinger Lars (22) en Julian (19) oppe Kenzesjtraot in ’t riék van de Duuvels. Hae zit gaer op de motor en is ‘nne richtige sjportman, dae naeve zien drökke baan tiéd vreej wet te make vur fitness en fietse. Voetballe duit hae al van kleinsaaf beej Sjportclub Irene. Met de kondisie van deze vitale viéftiger zit ’t dus wal good!
Det geldt zeker ouch vur adjudant John Bernards (52), ein volle naef van de hoëgheid en net zónne fanatieke voetballer. Allein ‘hip’ hae neet beej de Tricolores maar in het oranje-zjwart van Reuver, de klöp van ’t dörp wao hae aan de Karel Doormanlaan woënt in ein hoés vol vrouwluuj: zien maedje Sandra en eur dochters Samantha (21), Indy (15) en Sabrina, ’t sjterke van ’t gezin det nag altiéd in eur midde sjtraolt. Vur zien werk riejt hae doordewaeks nao Tegele. John sjteit beej Textielverzörging Schraven op de loënliés as marketing manager. Naeve voetbal helt hae zich fit met renne, ouch is hae gek van auto’s.


Adjudant René de Bitter (47) kent prins Erik ouch al zien ganse laeve. Hae woënt op ‘nne sjteinworp aafsjtand van zien groëte broor oppe Waterloosjtraot in Sjteyl. René is getrouwd met Rianne en vader van Kiki (11), Noah (8) en Jolie (6). Van beroep is hae global accountmanager beej Vodafone. Ein passie die hae met de hoëgheid deilt, is motorriéje. Sjporte zit ouch beej um in ’t blood, zien veurkeur geit daobeej oét nao taekwondo en duike. Daonaeve is hae lid van de Frei-Husaren von Glasenapp.
Wat de prins en zien adjudante boéte eure hechte femiliebangk ouch nag gemein hebbe, is det zeej alledreej lid zien van ’t Comité Kingerfiëste in Tegele. Wae good kiék, herkint op de foto dreej ‘sjieke’ zjwarte piete. Det verklaort de kleurriéke veere in ’t óntwerp van eur hoésorde, wao-in ouch ’t femiliewaope prominent nao veure kump. Prins Erik wis ouch metein naodet hae zien jaowaord had gegaeve, wae hae as adjudante ging vraoge. Met breurke René en naef John is zien druimtrio wörkelikheid gewaore.
Eure liéfsjpreuk sjprik vur zich:
‘As femilie knalle weej deze vastelaovend door, en det doon weej wies ’t allerletste oor!



