Tegele haet nag ein jubileumfiës tegood van vastelaovesgezelsjap De Beerpiëp. Twië fiësjes zelfs! Dus wuúrt d’r in ’t weekend van 24 en 25 november duchtig op die kis gehouwd!

In 2022 waas ’t op de kop aaf 5×11 jaor geleje det de Beerpiëp woort opgerich. Eine historische mijlpaol, wao weej gaer beej sjtil hadde wille sjtaon. Maar den neet met angerhalve maeter aafsjtand of angere beperkinge: det is maar half werk en pas ouch neet beej de wiéze wie weej in Tegele vastelaovend viere!
Dus woort ’t jubileumfiës ein jaor opgesjaove. Gelökkig zit det ellendige virus ós noow nimmer dwars en kump d’r van oétsjtel gen aafsjtel. Intaegendeil: weej gaon flink oétpakke!

Zaoterdig 25 november nuëdige weej idderein oét öm same met ós te prooste op ós 5×11-jäörig besjtaon. En op Graad Stroeks, iërelid van ós gezelsjap en de insigste dae d’r vanaaf ’t allerierste oor nag beej is.
De jubileum-aovend in kultureel centrum D’n Haandert begint um 19.00 oor met ein resepsie, die wies 20.30 oor zal deure. Aansjloétend bars ’t fiës ech los met de bekinde live band Net Oet Bed, die ónlangs nag op de Nach van ’t Limburgse Leed de prestigieuze Jo Ehrens Priés in de wach wis te sjleipe.

Maar we hebbe nag mier in petto. Want ouch de Beerpiëpjeug haet get te viere. Ós jeugaafdeiling woort in 2011 gebaore beej ‘t 4×11 jubileum – ein sjoëner kedoo hadde we ós neet kinne winse – en besjting in 2022 dus ellef jaor. Ouch dae verjäördig wuúrt ingehaold, en wie! De Beerpiëpjeug trap ’t jubileumweekend op vriedig 24 november aaf met ’n fiësje vur alle ‘opgesjaote jóngere’ van Tegele, Sjteyl en de Hei en idderein dae nimmer zoe jónk is maar zich wal nag zoe veult.
De name op ’t affiche sjtaon garant vur ein ‘Party ohne Ende’: Tod Lendex, Viva Vincenzo, NonDesJus, Sander Hovens en Maraponnie!
Inloup is vanaaf 20.00 oor en vanaaf 21.00 oor geit ’t richtig los! En nae, d’r is gen resepsie.
Kaarte koste 5 euro en zien via Facebook en Instagram te besjtelle beej de Beerpiëpjeug, maar ouch verkriégbaar beej de jeugleeje en aan de aovendkassa.