Houwe op die kis wies det d’r niks mier van euver is! Det had zoemaar de liéfsjpreuk van de nieje Beerpiëpprins kenne zien. Want Ramon I is eine vastelaovesgek dae niks leever duit as flink tam-tam make. Letterlik en figuurlik!
Ramon Camps (38) is op 1 fibberwarie in eine kolkende Haandertzaal oétgerope toet 56ste prins van Vastelaovesgezelsjap De Beerpiëp. Zien adjudante zien Loek Thijssen en Roy Pelzer.
Prins Ramon I is getrouwd met Aniek Hermans. Met eur kinger Ferre (2) en Liene (1) woëne zeej oppe Beijtelsjtraot, op eine sjteinworp van Brasserie Rach op d’n tômp van de Kerksjtraot, wao Ramon in ’t dageliks laeve de scepter en pollaepel zjweijt. Daonaeve is hae kepèlmeister en sjlaagwerker beej joekskepèl Sôkkerpáek, lid van Biljardairsvereiniging Gen Keus en ouch nag aktief binne de kemmissie Bals & Zittinge van ós zöstervereiniging D’n Oeles.
Det de joeks um in ’t blood zit, sjtraolde Ramon al van kleinsaaf oét wie hae nag op Sjteyl woënde. Neet toevallig krege de Kaetelaers um as menke al in ’t vizier vur de rol van Jeug Vors Lucifer, die hae in 1997 moch vervölle. Um dreej jaor later door de Sjteyler Soppers te waere gesjtrik as adjudant van prins Daan (van Kempen).
Dao bleef ’t neet beej. Ramon kwaam op de radar beej De 3-kes en woort in 2011 door nemes minder as Lex Uiting óntmaskerd as Groët-Venloosche Nar.
En nag ken hae ’t neet laote, want nao de duuvelspruuk en narrekap zit ouch de prinsesjteek um wie gegaote! Sjpreuk nummer 2.
Maar we hebbe d’r nag mier! Wat dóch geej van deze: zien adjudante weite ouch van wante!
Adjudant Loek (47) sjpeult same met Ramon beej Sôkkerpáek en ken minstes zoe good met de trómmelsjtök euverwaeg. Hae is getrouwd met Marijke Polmans en zeej woëne op de – op zien Tegels – Aajemèrtsjtraot same met Jasmijn (18), Teun (17) en Juup (11). Loek is as verpleegkundige werkzaam beej De Zorggroep en völt ziene vreeje tiéd neet allein met ‘Sôkkerpáeke’ maar mak ouch deil oét van brassband Brasskraft, en duit gaer kaoke.
Adjudant Roy (41) woënt met zien maedje Esther Wienen en eur döchterke Tess (5) in Venlo, maar is ‘nne rasechten Tegelse. Hae duit woëninginspeksies in deens van Antares en meug zich binnekort ko-ordinator veilig en gezónk woëne neume. Zien hobby’s zien zaalvoetballe beej Inter ’80, wielrenne, hardloupe en fitness. De prins lierde hae kenne via Esther in d’n tiéd det zeej same lid ware van De 3-kes.
Vrindsjap is wat eur alledreej verbingk. Daonaeve hebbe de adjudante ouch nag get met vastelaovesdinsdig. Loek is op dae daag in 2016 getrouwd en Roy wuurt den, as de beraekeninge kloppe, vur de twiëde kier vader.
En den nag eure echte liéfsjpreuk: ‘Vol passie en met ‘nne lach, viere weej vastelaovend, daag en nach!’