Daan Stapel is de 55ste Prins van Vastelaovesgezelsjap De Beerpiëp. Hae geit same met zien adjudante Sjoerd Sturme en Dirk van den Hombergh veurop in ’t vanwaege corona oétgesjtelde jubileumseizóen wao-in ‘t 5×11-jaorig besjtaon wuërt gevierd.
Prins Daan I is 40 jaor, getrouwd met Inge van der Velden en vader van Siem (9) en Jesper (5). Same woëne zeej oppe Hoëgsjtraot in Tegele woë vruuger kefee D’n Huub waas. Daan kump van de Hei en is van beroep budgetcoach beej Incluzio. In ziene vreejen tiéd is hae trainer van de JO10-1 van Sjportklöp Irene, ’t team van zienen aadste zoon Siem, en voetbalt hae zelf in ‘t 4de elftal van TSC’04.
Adjudant Sjoerd wuërt op vastelaovesmaondig 41 jaor en woënt met partner Laura Janssen en eur kinger Liva (8) en Kian (6) aan de Remundsewaeg op Sjteyl. Hae is werkzaam as accountmanager beej de firma Kersten Hölpmiddele en net zoë wie de Prins, lid van TSC’04.
Adjudant Dirk is met zien 39 jaor de benjamin van ’t sjtel. Hae is getrouwd met Milou Jeurissen en haet same met um twië kinger, Ivar (7) en Benthe (4). Eur huuske sjteit in Venlo, woë Dirk gebaore is; hae greujde aevel op in Tegele. Ziene werkgaever is Ginder, buro vur (vreejetiéds)economie in Den Bosch, en de vreeje eurkes bringk hae vur ’n deil door in de radiostudio van Umroop Venlo.
De prins en adjudante zien van kings-aaf gezjwaore kammeräöj, hebbe same in Breda gesjtudeerd en gewoënd, ware sjtamgaste van kefee Staccato, zien alle dreej as vreejwilliger aktief gewaes in ’t Witte Hoés en make deil oét van twië vrindegroepe: Hiëreleid en de Naate Sjnor. Naeve muziek en festivals bezeuke, hebbe zeej nag ‘n gezamelikke passie-j, en det is Ajax. Daan en Sjoerd zien zelfs lid van de supportersklöp. De adjudante haaj-je auch van fietse, Sjoerd duit wielrenne en Dirk zit gaer op ziene mountainbike.
Boéte det hebbe Daan in de rol van veurzitter en Dirk as sikkertaris, binne de organisaasie-j van picknickfestival Get Together in ’t Maasveld, eur sjpaore verdeend. De leefde vur vastelaovend hebbe zeej allemaol van genne vraemde. Sjoerd zien elders, Mart en Liesbeth, ware in 2003 broédspaar beej de Boereraod en pap woort twië jaor later adjudant van Oelesprins Theo V (Coort). Zellef moch hae in 1990 as bekkerke mei-j in de Venlose Boérebroélof. Daan zien sjoënvader Jo is besjermhiér van D’n Oeles en Dirk leep as menke met ziene pap mei-j in d’n optoch met joekskepèl de Wakkere Makkers
En mochte eur achtername uch bekend in de oëre klinke: jao, de prins is ein naefke van Huub, en adjudant Sjoerd mót ome zegke taenge Thei!
Eure liéfsjpreuk klingk in idder geval vuëlbelaovend:
‘Same bringe weej laeve in de brouwerie-j, en viere 5×11 met uch zie-j aan zie-j!’
De resepsie is op zóndig 28 jannewari van 15.45 wies 19.00 oor in de Haandert.