Met ’t Cambrinusbal geit vastelaovesgezelsjap De Beerpiëp ouch in 2023 wir veurop in d’n aanluip nao de Tegelse vastelaovend.
De zevende edisie is op zaoterdig 21 jannewarie in kultureel centrum D’n Haandert en äöpent al vruúg op d’n aovend met de oétreiking van de 41ste Pannekletser aan d’n hiér Gerard Fokkens. Hae wuúrt gehöldig vanwaege ziene breije maatsjappelikke inzet vur de gemeinsjap.
Gerard Fokkens waas en is nag altiéd aktief vur tal van vereiniginge en organisasies in Tegele en Sjteyl. Deze 72-jäörige Tegelenaer haet ein ganse wasliés aan besjteursfunksies op zien cv sjtaon. Wao-ónger ’t veurzittersjap beej Scouting Tichlouw, taofeltennisklöp TTC, vastelaovesgezelsjap D’n Oeles, ’t Limburgs Sjötterie Museum en de Sjtichting Cultureel Erfgood Tegele (SCET), die vurrig jaor de Harmoniezaal in het centrum heräöpende nao een ingriépende renovasie. Maar op ’t liéske sjtaon ouch ónger mier de sjtichting Optochhal Groët Venlo en ongernimmersvereniging Trade Port Zuid, öm maar aan te gaeve det hae ouch boéte Tegele vuul duit en gedaon haet vur de gemeinsjap. Vur zien talriéke verdeenste is Gerard Fokkens al dökker ge-ieërd – ónger angere met de Trias Tegula – en ontving hae in 2006 ein keuninklikke óngersjei-ing. Mier vèlt te laeze in de nieje oétgaaf van ós vastelaoveskrant ’t Piepke, die op 8 jannewarie hoés-aan-hoés in gans Tegele en Sjteyl is rónkgebrach.
Beerpiëptrio
Nao de aansjloétende resepsie vur de laureaat volg rónk de klok van 21.00 oor de prizzentasie van de 54ste Beerpiëpprins met zien adjudante, ’t twiëde hoëgtepunt van deze aovend. Veur en nao de ónthölling wuúrt ’t publiek in de theaterzaal van D’n Haander geammezeerd met optraejes van joekskepèl Sókkerpáek, de Venlose band Greun Graas en DJ Tren. ’t Cambrinusbal begint um 18.30 oor, de entreej is gratis.
Jeugmatinee
Daags daonao mak ’t nieje jeugtrio van de Beerpiëp zien opwachting op dezelfde lokasie. ’t Beerpiëpjeugprinsematinee, met muziek van DJ Tod Lendex en ein optraeje van de dansgarde van d’m Boereraod, begint um 16.00 uur en is ouch gratis toegankelik.
