Vuul walgemeinde wäörd van waardering ware aafgeloupe zaoterdig te beloestere op de interne sezoensäöpening van vastelaovesgezelsjap De Beerpiëp in kefee Coëba. Dao woorte de jubilarisse van 2021 en 2022, maar leefs 15 in getal, in de sjiénwerper gezatte. Vanwaege eur 1×11-jäörig lidmaatsjap woorte gehöldig: Ferdie Muijzers, Gerard Hendriks, Eric Linders, Marco Ketelings, André van Aarssen, Franc van Baar, Jordy Verhalle, Niels van Rijt, Jelco Schreurs en Dion Geraads, dae neet aanwezig kós zien. Wil Soepboer, aad-vors, en Paul Stevens óntvinge de versiersele die huëre beej ‘t 2×11-jäörig lidmaatsjap. Chrit Huismans en Hen Schoolmeesters zien alwir 3×11 jaor verbónge aan de Beerpiëp en krege de daobeej behuërende jubileumsjpeld opgesjtaoke. Graad Stroeks sjpande aevel de kroën met 5×11 jaor achter ziene naam. Hae is as insigste nag euver van ’t gruúpke Tegelenaere det in 1967 beej de oprichting van de Beerpiëp waas en daomei de letste van ’t alleriérste oor. Alle jubilarisse woorte toegesjpraoke en gehöldig door veurzitter Leon van Deur en óntvinge ouch nag ein óngersjei-ing van de Bónd van Carnavalsvereiniginge Limburg (BCL), dae met ein delegasie nao Tegele waas aafgereis. Daonaeve woort d’r aafsjiéd genaome van ’t Trio 2020, prins Erik I (de Bitter) en zijn adjudante John Bernards en René de Bitter. Zeej zien nao eur aaftraeje alle dreej door Vors Cambrinus VII Stevie Haazen ge-insjtalleerd as aspirant-lid van de Raod van 11. Ouch beej de Beerpiëpjeug, dit jaor op de kop aaf 11 jaor jónk, ware get plichpleginge te vervölle en in te haole. Jeugvors Vince Coolen moch 6 nieje leeje welkóm heite beej de Raod van 11. Joey Driessen, Noah Janssen en Levi Schrijvers woorte door um ge-insjtalleerd.  Gianny Steegh, Djo Denissen en Roel Gommans ware verhinderd en waere op ein later moment nag offisjeel opgenaome in de Jeugraod. Taeves woort Stan Teeuwen beneump toet nieje Chef du Protocol.