Tegele – Ein jaor later as gepland vanwaege corona viert vastelaovesgezelsjap De Beerpiëp oét Tegele kómmend sezoen ‘t 5×11-jäörig besjtaon. Vurrige waek is ‘t fiësjaor aafgetrap met ein groëte jubileumloëteriej.

De loëteverkoup is op 26 augustus gesjtart en deurt wies 2 fibberwari 2024. Ein jubileumlot kos 11 euro per sjtök, wae d’r twië of mier köp, kriég d’r graties eine jubileumpin beej.

De houfpriés is ‘n geldbedraag van 555 euro, de twiëde prijs bedruëg 222 euro en de derde priés is 111 euro. Daonaeve zien d’r nag ‘nne gas kleinere geldpriéze en kedoobónne van Tegelse óngernimmers te winne.

De trekking van de jubileumloëteriej is op vriédig 9 fibberwari um 21.00 oor tiejes ‘t Veurpreuversbal woë-mei de Beerpiëp de Tegelse vastelaovend äöpent in de Harmoniezaal.

Wae ein of mier jubileumloëte wil koupe, ken daoveur terech beej ein van de leeje van de Beerpiëp of ‘nne mail sjteure nao: loterij-5×11@beerpiep.nl.

De opbrings van de loëteriej kump ten gójje aan de organisasie van de jubileumfestiviteite  in ’t letste weekend van november en de vastelaovesaktiviteite van de Beerpiëp.